ការពិតអំពីខួរក្បាលមនុស្ស

ខួរក្បាលជាសេរីរាង្គស្មុគស្មាញ និងពិបាកយល់នៅក្នុងប្រព័ន្ធរាងកាយរបស់មនុស្ស។

របស់ប្លែកៗដែលយើងគ្រប់គ្នានឹកស្មានមិនដល់ ត្រូវបានបង្កើតនិងច្នៃប្រឌិតឡើងចេញពីថាមពលដ៏អស្ចារ្យរបស់ខួរក្បាលមួយនេះ។ ​

យើងធ្លាប់លឺគេនិយាយថា 

<<ខួរក្បាល១គីឡូ៤ខាំដូចតែគ្នាគេរៀនចេះខ្ញុំរៀនមិនចេះ>>

 

ជាការពិតណាស់ដែលថា ខួរក្បាលមានទម្ងន់ប្រហាក់ប្រហែលគ្នា។ ប៉ុន្តែអ្វីដែលធ្វើអោយវាខុសគ្នាគឺ តាមរយៈបទពិសោធន៏ដែលយេីងធ្លាប់ឆ្លងកាត់មកខុសៗគ្នា។

 

យ៉ាងណាក៏ដោយ នៅក្នុងអត្ថបទនេះគឺចង់ផ្តល់ជាឧទាហរណ៏និងវិធីសាស្រ្ត ដែលធ្វើអោយអ្នកចងចាំបានយូរ និងមិនងាយភ្លេច។

ប៉ុន្តែនឹងមានអ្នកខ្លះជំទាស់ថា   

<<ចាំបាច់ចាំអោយឈឺខួរធ្វើអ្វី សម័យឥឡូវសួរតែពូGoogleយកទៅណាមិនអស់>>

 

អ្វីដែលសំខាន់ក្នុងការហ្វឹកហាត់នេះ មិនមែននៅត្រង់ការចាំអ្វីៗទាំងអស់នោះទេ។

កាលណាយើងប្រើខួរក្បាលញឹកញាប់ វាធ្វើឲ្យខួរក្បាលយើងប្រសើរឡើង អាចចងចាំបានកាន់តែលឿន។

នៅពេលយើងចង់ស្វែងយល់ពីអ្វីថ្មីៗ ក៏ងាយស្រួលជាងមុនដែរ។

ពេលខ្លះ យើងធ្លាប់ជួបសំណួរងាយៗ ប៉ុន្តែបែរជាគិតមិនចេញថាត្រូវឆ្លើយយ៉ាងណា។

 

ការបង្កើតរូបភាពនៅក្នុងខួរក្បាល  

អ្នកទាំងអស់គ្នាសុទ្ធតែធ្លាប់ឆ្លងកាត់ការប្រឡងហើយមែនទេ? ហើយធ្លាប់អានសំណួរហើយត្រូវចំណាយពេលគិតយូរអត់​?

ពេលខ្លះយើងអានចប់ហើយ ប៉ុន្តែហេតុអ្វីបានជាគិតរកចម្លើយមិនចេញសោះ?

តើមានមូលហេតុអ្វីដែលធ្វេីអោយយើងភ្លេចនូវអ្វីដែលធ្លាប់រៀន ឫអានទៅហើយនោះ ?

មានបុរសម្នាក់សក់ស ក្បាលពោះធំ ធ្លាប់ឆ្ងល់សំណួរដូចយើងឆ្ងល់ដែរ ទើបគាត់ដាច់ចិត្តធ្វើការស្រាវជ្រាវ ហើយតាមលទ្ធផលនៃការស្រាវជ្រាវ គាត់បានសន្និដ្ឋានថា

ក្រោយពេលវេលាកន្លងផុតទៅ២០នាទី អ្នកនឹងភ្លេចទិន្នន័យដែលបានទទួលទៅសឺងតែ៥០%​​។ 

នេះបង្ហាញអោយឃើញថា ការចងចាំមានតម្លៃច្រាសទៅនឹងពេលវេលា។

ដូច្នេះ ទើបអ្នកដែលចង់បានលេខ១ជឿថា ការអានសៀវភៅដដែលៗជាគ្រឹះសំខាន់នៃការរៀន ព្យាយាម

ទន្ទិញមេរៀនពីសាលារៀន និងតាមInternetជាដើម ដែលយូរៗទៅ អាចធ្វើអោយមានអារម្មណ៏ធុញទ្រាន់ បេីនិយាយអោយពិបាកស្តាប់ ទ្រលាន់នឹងការរៀន ឫរៀនលែងចូល។

 

អ្នកទាំងអស់គ្នាមិនចាំបាច់ភ័យព្រួយអ្វីឡើយ ហើយងាកមកស្វែងយល់ពី វិធីសាស្រ្ត ដែលធ្វើអោយយើង សាហាវដូចលោកតា អាញស្តាញចឹង។

ប៉ុន្តែអាចនឹងមានមនុស្សប្រឆាំងឡើងមកថា៖

 

អើយនៅសុខៗ ខួរក្បាលយើងនឹងអភិវឌ្ឍឡើងបានបែបនឹងឫ ? (Impossible mission)

 

បេីដូច្នោះ ចូរយើងសាកល្បងមកស្តាប់រឿងនេះសិន។

អ្នកគ្រប់គ្នាធ្លាប់ដឹងអត់ថា អច្ឆរិយបុគ្គលដូចជាអាញស្តាញធ្លាប់ជាសិស្សដែលរៀនមិនទាន់គេកាលពីនៅមធ្យមសិក្សា?​ 

ពួកយើងអាចគិតថាអាញស្តាញ  ឆ្លាតជាងក្មេងទូទៅទើបមិនអាចរៀនជាមួយក្មេងធម្មតាបាន

ប៉ុន្តែគ្រូគាត់ជឿថា គាត់ជាក្មេងល្ងង់ដែលមានការរីកចម្រើនផ្នែកសតិបញ្ញាយឺតជាងមិត្តរួមថ្នាក់ផ្សេងៗទៅវិញ 

តេីវាពិតជាអាចទៅរួចបានយ៉ាងហ្នឹងឫ?

 

តាមពិតទៅអាញស្តាញខ្វះសមត្ថភាពក្នុងការអាន ទើបធ្វើអោយគាត់មិនអាចយល់ពីខ្លឹមសារក្នុងសៀវភៅ រួមទាំងពាក្យសម្តីរបស់លោកគ្រូ  អ្នកគ្រូបាន។ 

ចុះ តើគាត់ប្រើវិធីសាស្រ្តយ៉ាងណា ទើបអាចក្លាយជាអច្ឆរិយបុគ្គលបាន?  

 

លោកតាអាញស្តាញបានអធិប្បាយពីវិធីដែលធ្វើអោយគាត់ក្លាយទៅជាអច្ឆិរយបុគ្គលបានថា   

 

<< ខ្ញុំមិនអាចយល់ពីអត្ថន័យក្នុងសៀវភៅ និងពាក្យសម្តីរបស់អ្នកដ៏ទៃបាន ហេតុនេះហើយទើបខ្ញុំត្រូវធ្វេីការស្វែងយល់ដោយប្រេីការគិតស្រមៃបង្កើតជារូបភាពឡើងក្នុងខួរក្បាល ហើយប្រែទៅជាភាសាដូចជាអ្នកដ៏ទៃដែរ។>>

 

ស្តាប់ទៅដូចចម្លែកបន្តិច ប៉ុន្តែបើយើងយកទៅអនុវត្តនឹងទទួលបានអត្ថប្រយោជន៏ដ៏អស្ចារ្យ។

បើមិនជឿអាចសាកបាន។    

ដើម្បីដោយដឹងកាន់តែច្បាស់ យើងមកសាកលេងហ្គេមងាយៗជាមួយគ្នា។  

ពាក្យនៅខាងក្រោមនេះទាំងអស់មាន ១០ពាក្យ ហើយ១ពាក្យ ខ្ញុំទុកពេល២វិនាទីឲ្យអាននិងទន្ទិញ មុនឈានទៅពាក្យមួយទៀត 

បន្ទាប់មកសាកចាំពាក្យទាំងនោះតាមលំដាប់របស់វា បើសិនជាអ្នកចាំពាក្យមិនតាមលំដាប់ នឹងចាត់ទុកជាមោឃៈ។   

 

កុំព្យូរទ័រ, នុំប័ង, ពពក, មឹក,  ប្រាសាទ, ដែកកេះ, ទូរស័ព្ទដៃ, ខ្សែភ្លើង, សត្វក្តាន់, ដូមីណូភីហ្សា 

អ្នកទាំងគ្នាចាំបានប៉ុន្មានពាក្យដែរ? ចាំបានតិចមែនទេ?

ចុះបើខ្ញូំប្រាប់អ្នកទាំងអស់គ្នាថាប្រសិនបើអានពាក្យហ្នឹងរួច ហើយសាកស្រមៃទៅជារូបភាពដែលយើងធ្លាប់បានឃើញ រួចយកពាក្យនីមួយៗ មកតភ្ជាប់គ្នាដូចជាសាច់រឿង៖

 

ខ្ញុំកំពុងតែលេងកុំព្យូរទ័របណ្តើរ ញាំនំបុ័ងបណ្តើរ ហើយក៏ងាកទៅក្រៅបង្អួច ឃើញពពកមានរាងដូចជាសត្វមឹកទុំជាប់នឹងប្រាសាទ ក្រឡេកមកវិញ ក៏ឃើញមានដែកកេះដាក់

នៅលើទូរស័ព្ទដៃ និងខ្សែភ្លើងកំពុងតែបញ្ចូលថ្ម ភ្លាមៗនោះក៏លឺសំឡេងសត្វក្តាន់ចេញពីក្នុងកុំព្យូរទ័រ វាកំពុងតែញាំដូមីណូភីហ្សា ធ្វើមុខកាហេហេ។​

 

​សរុបសេចក្តីមក​ ការទន្ទេញចាំដោយភ្ជាប់ពាក្យជាមួយរូបភាពនឹងជួយអោយយើងចាំបានច្បាស់ជាងការចាំដោយទន្ទេញតួអក្សរ។ ម៉្យាងទៀត អ្នកគួរតែសាកបង្កើតរូបភាពដែលខ្លួនឯងច្នៃប្រឌិតឡើងមកល្អជាង ហើយកុំខ្វល់ថាអ្វីដែលខ្លួនឯងគិតជារូបភាពនោះត្រូវឫខុស អោយតែគិតឃើញមកភ្លាមៗ។